Neefs jag 2016

[spekieries]

Neefs jag 2016

Oudergewoonte het my neef ons weer genooi om in 2016 daar by hom te kom jag. Sy plaas Scorpion is eintlik ‘n Beesplaas so 20 km Noord van Legkraal in die Vhembe distrik, nader aan Louis Trichardt as aan Pietersburg. Vanweë my vrou se siekte het ek die 2015 jag gemis. In ons oor en weer kommunikasie het ek aangedui dat ek graag in 2016 ‘n mooi koedoebul wil skiet.
Die jag was vanaf 29 Junie 2016 tot 3 Julie 2016.
Ek het my voorgeneem dat my seun van 13 jaar hierde jaar sy eerste bok gaan skiet. Hiervoor het ek die 6.5x55 Howa met 140 grein Claws gelaai. Ons was redelik gereeld op die skietbaan en hy kon 5 skote agter mekaar op 75m in die hartlong area van die springbok teiken skiet. Hiervoor het hy gewone tweebeen skietstokke gebruik . Die ander geweer wat ek saam gevat het was ‘n .308 met ‘n P14 aksie en ‘n Truvello loop. Vir hom het ek 165 grein Claws gelaai. Ek was ernstig om ‘n Koedoe te skiet en ek wou eintlik my 9.3x62 of my .375 Ruger saam vat maar my uurglas het uitgeloop voordat ek vir een van die twee kon laai.
Ons is die Woensdag 29/06 hier uit Centurion weg. Nadat ek die kleinneefs in Pietersburg opgetel het was ons so oor middagete op die plaas. Nadat ons alles uitgepak het en ‘n stukkie geëeet het, het die seuns dadelik (na die normale veiligheidspreuk) die plek besoek waar die voer staan om duiwe te skiet.
So teen 16.00 het ons met die voertuig vertrek om die “Lister” te gaan afskakel want die tenks was vol. Ek het saam gery. Die plan was om sommer so stadig van die pomp af terug te stap en te kyk of ek nie iets kry nie. So 800m van die pomp af het die werker op die landrover rooibokke gesien.
Ek het so half in die ry uitgeklim en ek het so 10 m. gevorder toe ek ‘n ram so op 90m sien staan. Ek het sommer dooierus oor die draad aangelê. Hy was bietjie agter die takkies maar ek het al geleer dat as jy vir ‘n oop plankdwars skoot gaan wag in die Bosveld, jy elke vierde jaar miskien ‘n bok gaan skiet. Die skoot het geloop. Dit het goed gevoel.
Ek het my lyn mooi gekry met ‘n klein Kanniedood boompie en dadelik gaan soek na wegspringspore en bloed. Nou wil ek eerlik wees, lyn is maklik maar ek sukkel altyd met die diepte persepsie. Toe die voertuig terug kom het ek vir my neef gewaai. Hulle het gestop en ons al drie het gesoek. Wegspringspore maar niks bloed nie. Ek het gesien in watter rigting hulle gegaan het. So 70m van die plek waar ek hom geskiet het het hy gelê.
By die slagplek kon ek sien dat ek die bopunt van die hart getref het. Die Claws het mooi deur geskiet. Kaliber gaatjie een kant en 5 Rand grote uitgangswond. Wat my pla was die min bloed op die wegholspoor. Claw is ‘n “bonded” koeël en partymaal wonder ek of gewone loodkern patrone nie beter is op kleinraam bokke nie. Vleisskade is meer, maar ‘n goeie bloedspoor is goud werd in die bosveld as ‘n bok 70m gaan. Bokke is al baie verloor in die ruie rooibos, sekelbos, swarthaak gedeeltes.
Die aand laat het my ander neef opgedaag. Hy is in die mediese professie en hy moes nog pasiënte ontslaan voordat hy kon kom jag. Ons het sommer die aand bespreek hy sou die volgende dag met een van sy seuns bo die huis jag en ek met my seun onder die huis. Ons is bevoorreg dat ons alleen, sonder ‘n gids (beeswagter) kan jag. Gewoonlik is die kampe waar die beeste loop buite perke want daar word bees gewerk.
Donderdagoggend was ons vroeg in die veld. Ek het saam met my seun geloop met die 6.5x55. Die hele oggend sessie van so 7 tot 12 het ons net ‘n groot vlakvarkbeer gekry. Ons was gedurende die middagsessie ook ongelukkig en het niks gekry nie. Daar is egter baie onderrig gegee. Die stil stap, grootbewegings wind lees en spore het darem gesorg dat die jag nie heeltemal onproduktief was nie.
Laat die Donderdag aand het my ander neef (laaste een van die jaggroep) opgedaag. Hy is in die wildbedryf en moes nog die Donderdagmiddag ‘n klomp Swartwitpense laai.
Die volgende oggend is ons al drie uit met ons seuns. Niemand het iets geskiet nie maar ons het darem ‘n groot trop rooibokke gekry. Soos ek vir my seun sê “ Dit is een ding om die bokke te kry, dit is ‘n ander ding om ‘n skoot te kry.
Laat geurende die Vrydag middag sessie skiet my een neef ‘n mooi jong koedoebul. Horings raak so aan die 50 duim. Toe ons hom in die die slagkamer het was die al donker. Net toe hy hang kom my ander neef by. Hulle het ‘n koei gekwes. Lang skoot langs die lyndraad af. Hy gooi baie bloed maar dit het te donker geword hulle kon nie verder op die spoor gaan nie. Hy het egter die spore mooi met toiletpapier gemerk. Dadelik sê my neef aan wie die plaas behoort dat ons nou ry en gaan soek. Met al wat ‘n koplig en Led lenser is, is ons daar weg. Ons kry die plek waar hulle gemerk het maklik en die bloedspoor is redelik duidelik in die flits lig. So vyftig meter waar hulle nie meer kon sien nie kry ons die koei. Sy is nog op haar pote en in die haas het niemand ‘n geweer gebring nie. Gelukkig het ek my 9 mm P by my. Kopskoot later lê die bok. Die herwinning van die karkas in die swarthaak sekelbos en haak- en- steek was nogal ‘n avontuur. My seun het die volgende dag so 2cm doring uit sy been gegrou.
Die laaste dag breek aan. Ek het min vleis die jaar, net die rooibokrammetjie. Die Vrydagaand het die wind lekker begin stoot uit die Ooste. Die koue front het opgedaag. Saterdagoggend is ek al 6 uur in die veld. Dit is vrek koud en ek lê voor op ‘n hoogtetjie waar die koedoes vroeg oggend kruis. Ek sit tot so 7.30 en wag. Behalwe vrekkoud kom niks verby nie. Ek besluit maar om weer te jag. So tien uur skiet ek ‘n Rooibokram skoon mis. Ek is so gatvol vir myself ek kies sommer dadelik koers terug kamp toe.
Daar gekom, honger soos ‘n bees “Brunch” ons lekker met gebakte eiers koedoe lewer en baie uie en gister se aartappels in die skil. “Twee uur sê ek vir die manne ek vat sommer die kamp onder die huis en die volgende kamp met die digte geelhake. Ek vat die .308 en begin sommer van die huis af stap. Ek stap alleen. Ek stap stadig, sag en ek stop baie en dan bespied ek die bos voor my. Die oostewind waai skuins voor my verby. Dit vat my so uur en ‘n half om deur die kamp te stap. Die kamp waar een van die beestroppe stap is geëlektrifiseer. Ek gaan deur die hekke en toe ek in die Geelhaak kamp kom toe besef ek ek sal eers moet om stap sodat die wind reg is.
Die geelhake maak sulke digte stande waar die regop bome naby mekaar groei. Die oostewind waai so skuins van voor. Ek loop moeilik want ek haak en moet die heeltyd pad soek om deur te kom. Ek loop egter baie stadig en probeer so sag moontlik loop. Ek stop elke paar tree en kyk. Ek het seker so 300m deur die geelhake gevorder toe ek die koedoebul sien.
Hy is agter die takke seker so 60 of 70 tree van my af. Ek is in ‘n oop stukkie. Ek sak stadig op my hurke en plaas die skietstokke op die grond neer. Net toe ek wil aanlê, lig hy sy kop om bo aan ‘n haak- en- steek struik se blare te knibbel.
Stadig lig ek die geweer, hy sien die beweging draai sy kop en kyk my stip aan. Op daardie stadium was my geweer so 30° gelig. Iewers het ek eendag gelees ‘n mens moet nie direk vir ‘n wilde dier kyk nie, hy voel dit aan. So ek loer hierdie koedoe so onder my hoed se rand. Die adrenalien pomp, ek kan sien dit is ‘n pragtige bul. Ek skat ons loer mekaar seker vir so drie minute. Dit mag langer wees dit mag korter wees. Ek beweeg nie, hy beweeg nie. Dit is soos die engelse sê “a standoff”. Ek weet as hy beweging gaan sien is hy weg. Die probleem is my voorarm wat daardie geweer so 30° hou begin bewe van die inspanning. Ek besef dat ek nie so sal kan aanhou nie. Baie dinge maal deur jou kop. Ek besluit ek gaan stadig optel en dan skiet. Eerder dit as wat ek die geweer gaan sak dan is hy weg sonder dat ek probeer het.
Stadig so stadig lig ek die geweer. Die kolf was gelukkig reeds in my skouer. Toe die Nikon onder die ken vassuig toe klap die skoot. Daardie massiewe pragtige dier sak net daar neer. Ek haal dadelik oor en stap nader. Toe ek daar kom sien ek sy oë is nog helder. Ek skiet hom op sy oor dood. As kind het ek seker te veel “Skankwan van die duine” gelees en ek dink met die jare kom die emosie ook al hoe meer te voorskyn. Maar ek pik ‘n traan en stuur ‘n skietgebed op na die Goeie Gewer dat ek in Sy natuur so ‘n pragtige skepsel se lewe mag geneem het.
4-5 Km plaas opstal toe. Dit is 4:30, die bok moet herwin word. Dit was donker toe ons met ‘n liggie van die LED wat op die die bakkie se battery gekoppel is die pens trek. Glo dit of glo dit nie die foto wat ek plaas is die enigste foto wat ek het. In die proses het ek my kamera verloor.
Die vleis is by Robbie ingegee. Hy het die karkas geweeg op sy skaal. 190.8kg. Ek het ook die horings daar ingegee vir ‘n skedel montering. Die langste horing links meet 58 en ‘n kwart duim.
My koedoe, waarvan baie drome het, het geval.
http://i780.photobucket.com/albums/yy85/spekieries/Anton%20Selfoon%202269_zps8xfuxu5i.jpg

[koos 2]

WOW !!!! Baie geluk en dankie vir die deel.
So groot bul is n groot droom van my.

[Springkudu]

Blikskottel dis mooi!!! Almal het mos hulle "mooiste" dier, die Kudu is myne. Ek moet ook nog eendag my groot een gaan haal. Baie geluk!!

[VdWalt]

Baie geluk. Ek dink ons is familie, julle vergeet net om my te nooi. Sal volgende jaar reg wees om saam te gaan.

[ruaanb]

sjoe baie geluk!

[hpcoetzer]

Pragtag!

[Johan Nel]

Mooi gedoen Spekieries. Ek is bly jy kon so 'n mooi en besonderse koedoe jag! Dankie ook dat jy die storie met ons gedeel het.

[win270]

Pragtige bul. Baie geluk! Dis menige jagters se droom. Spog maar met hom!

[Dirkonius]

Baie geluk, dis 'n pragtige koedoe bul daai! Lekker gelees aan jou verhaal ook. Het jou seun toe niks gekry nie?

[Stefan764]

Appels!!

[spekieries]

Dirkonius, nee hierdie keer kon hy niks kry nie. Dit is ook 'n leerskool dat jag nie voor-die-hand liggend is nie. Hulle staan nie in die veld vasgemaak nie. Hy het hard saam met my gejag maar nie geskiet nie. Ek sal kyk of ons nie miskien later die jaar weer plan kan maak nie.

[Sean3006]

Mooi kudu daai

[PWV]

Spiekeries, jou ou doring! As hy weggekom het, sou ek baie kwaad vir jou gewees het!

[spekieries]

Dankie Oom PW. Ja dit is daardie een keer in 'n leeftyd bok.

[toelie]

Baie mooi storie en bitter mooi bok, baie geluk

[Frederik]

Prag bul geluk.

[spekieries]

Dankie manne. Ja dit is 'n een keer in jou lewe bok.

[Vlakvark Soldaat]

Baie netjies, ek het n reel, as ek n groot kudu teekom, gaan ek skiet, ongeag of ek die geld het of nie, sal reelings tref om te betaal...

[tau]

Bitter netjies en baie geluk. Daai groot bulle skop jy nie net agter 'n bos uit nie

[Stephan86]

Dankie dat jy jou storie met ons kom deel het, dit was baie mooi vertel. Baie geluk met die pragtige bok!

[Trompie]

baie baie mooi bul. Geluk!
Dis net jammerte jyt nie mooi foto in die veld nie