Botswana Jag

[nyati375]

Ons het verlede week gaan jag in Botswana teen die Limpopo rivier. Maande se uitsien na ons jaarlikse trip het uiteindelik aangebreek en ons is so 9:00 Woensdagoggend deur die grens. 13:00 was ons in die veld na 'n vinnige brunch. Ons het dadelik gesien dat die bokke al redelik wild geskiet is. Ons gaan gewoonlik vroeer in die seisoen. Die jagters voor ons het 54 rooibokke en paar koedoes vir die week gejag.

Ek wou baie graag 'n bosbok skiet, so ek het op die wal van die limpopo rondgesluip die laaste paar ure voor sononder. Ek wou kyk op een van die eilande in die limpopo om te sien of daar nie dalk bosbokke skuil nie. Ek het egter net 'n groot trop koedoes op die eiland gekry en rondom hulle probeer sluip. Hulle het my toe gehoor en uit die bosse gebars. Voor my het daar twee bosbok ramme ook gehardloop wat hulle verjaag het. Ek het toe verder die middag net bosbok ooie en koedoes gesien.

Die volgende oggend het ons eers op 'n ander deel van die plaas gejag vir rooibokke en wildebeeste. Ek het so uur gestap voor ek 'n rooibok hoor blaas het. Ek en die gids het na die blaas geluid gestap en onder die wind gekom. In 'n straat tussen die mopanies het 'n mooi rooibok ram nek gerek vir ons gestaan en kyk. Ek het hom geskiet voor die bors en was dankbaar vir die mooi bok. Nadat ons hom gesleep het tot by die naaste pad en 'n nota op die bakkie ruit gelos het vir my broer om die bok te laai was ons weer die mopanies in. Die plan was om die 8km tot by die kamp terug te werk. Na drie ure se loop waar ons net koedoes gesien het het ek 'n beweging regs van my gesien. Ons was besig om in die pad te stap naby die kamp. Daar was paar rooibokke wat paralel met ons geloop het. Ons het in die pad gewag vir hulle om te kruis. Ek wou 'n ooi skiet, maar die ram het eerste oor die pad gekom en ons gesien. Hy het omgespring en ek het hom weer voor die bors geskiet. Die ram se lyf was uitsonderlik groot. Sien foto's.

Terug by die kamp was ek flou na die +- 15km se stap. Ons het weereens lekker brunch gemaak en bietjie gerus. So teen 14:30 het ons afgery na die Limpopo. Dis so 10km padlangs. Ek het my broer afgelaai en verder gery. Die plan was dat hy na die bakkie sou stap en my dan teen sononder oplaai. Die stuk teen die Limpopo is so 5km waar ek kon soek na die bosbokke. Ek en die gids het die laaste kilometer of twee gestap limpopo toe van waar ons die bakkie gelos het. Ek kon nog 'n rooibok ram en koedoe koei skiet, maar my gedagtes was reeds besig met die bosbokke.

Ons het weer onder in die limpopo begin stap, teen die water. Ek was soms skrikkerig met die riete hoer as my kop en die seekoeie en krokodille in die area. Daar was ook paar dae vroeer klomp olifante deur die plaas. Toe ons weer die eiland bereik van die vorige dag het ek die eiland probeer fynkam met my verkyker, maar kon niks sien nie. Dit is stik donker in daardie digte bos. Ons het toe om die eiland begin werk. Stadig. Ek het effend moedeloos geraak toe ons die einde van die eiland bereik, maar toe sien ek een sonstraal wat blink op die effense rooi van 'n bosbok. Ek kon eers nie in die donker sien watter kant is voor of agter nie, maar hy draai toe effens toe hy van ons bewus raak. Toe ek sy horings sien skiet ek hom skuins van voor. Die 375 punt is vinnig deur en hy het een tree gegee voor hy gaan le het.

Ek het 'n vinnige skietgebed gedoen, want hierdie was een van my groot drome. Ek kon nie vir 'n beter 'setting' vra nie. Regs van my het 'n krokkodil oomblikke gelede nog in die water gedryf. Die visarende het geroep en verder was die enigste geluid die gekibbel van die water in die limpopo. Wat 'n voorreg.

Teen Donderdagmiddag was my jag toe verby en ek kon lekker saam my familie en vriende stap en hulle ervarings saam met hulle geniet. Ons het 11 Rooibokke, Bosbok en Zebra gejag vir die naweek.

IMG_1293.JPG

IMG_1298.JPG

IMG_1291.JPG

[nyati375]

Ram1.jpg

Nog 'n foto van die eiland

Eerste ram

IMG_1295.JPG

[FHM]

Geluk met jou suksesvolle jag "buffel 375"
Baie mooi daar waar jy gejag het!

[DWB]

Pragtig! Baie geluk!

Ook op my Bucket List!

[ruaanb]

baie geluk met die mooi bokke.

[Maartin]

Yster van 'n bosbok daai, Baie geluk

[koos 2]

Baie geluk aan die jagter

[Parker]

Lekker storie. Waar in Botswana het julle gejag? Ek jag ook gereeld op twee plekke daar. Een by Groblersbrug deur en die ander een by Stockpoort. Albei plase ook teen die rivier. Billike pryse in Botswana op die stadium.

[Frederik]

Mooi bosbok baie geluk.

[Bosvark.303]

Besonderse horings op daardie bosbok. Baie geluk

[tau]

Baie geluk dit is vrek mooi daar.

[honda2]

Baie geluk. Baie mooi bokke daai.

[win270]

Mooi storie, pragtige omgewing en knap geskiet!! Daardie area is werklik 'n jagmekka.